LAOAG CITY – Natay ti maysa a driver ti motorsiklo kalpasan a nakidinnungpar iti maysa nga SUV iti paset ti Brgy. 19 San Lorenzo iti ili ti San Nicolas.
Nabigbig daytoy a ni Aurelio Urbano, agtawen ti 26, awanan ti asawa ken residente iti Brgy. 9, San Lucas iti nasao nga ili idinto a ti nakadinnungpar na ket ni Jefferson Miguel, agtawen ti 26 ken residente iti Brgy. 54-B Camanggaan ditoy ciudad ti Laoag.
Segun ti imbestigasyon ti PNP, naggapo ni Urbano iti daya a paset ti lugar ken bumallasiw kuma iti kalsada idi ta nakadinnungpar na ni Miguel nga agpa-amianan a direksyon.
Gapo iti daytoy, naitaray iti Governor Roque Ablan Sr. Memorial Hospital ni Urbano ngem naideklara a dead on arrival babaen kenni Dr. Allan dela Cruz.
Basar ti report, saan a nakasuot ti helmet ni Urbano idi mapasamak ti insidente.
Naamoan a ti driver ti SUV ket nagpositibo iti impluwensya ti nasanger kalpasan a dimmalan ti liquor examination.
Mainaig iti daytoy, awan ti nagbalbalinan ti motorsiklo ni Urbano kalpasan a naikkat ti manibela, silaw ken nabittak ti makina na.
