Balligi ti naiyuswat a drug buy bust operation iti Barangay 7-B ditoy ciudad ti Laoag a nakatiliwan ti empleado ti Provincial Engineering Office.
Nabigbig ti subject ti operasyon a ni Mark Christian Peralta, agtawen ti 32, awanan ti asawa, driver ken residente iti Barangay Puruganan iti ili ti Dingras.
Segun kenni Police Lt. Emmanuel Antonio, team leader iti Regional Police Drug Enforcement Unit 1, naglako ti maysa a sachet ti maipagarop a shabu iti police posuer buyer.
Malaksid iti daytoy, kunana a naala iti bulsa ni Peralta ti maysa pay a sachet ti maipagarop a droga ken uppat a sachet ti residue ken lima a ribo a pisos.
Mapatta-patta na nga agdagsen ti maysa a gramo ti iligal a droga ken agbalor ti 10 a ribo a pisos.
Inlawlawag na a sakbay a mapan iti pagtrabahoan ni Peralta ket naginnawat da iti posuer buyer iti mismo a kalsada nga agturong iti opisina da a sakop iti Barangay 7-B.
Inbatad na a ni Peralta ket miembro iti maysa a drug group ngem saan nan nga dinakamat tapno saan a maapektaran ti sumarsaruno nga operasyon da.
Kuna ni Antonio a basar iti pannakisarita da kenni Peralta ket inadmitir daytoy a nagusar ti iligal a droga idi naminsan nga aldaw.
Nupay kasta, iti pannakiuman ti Bombo Radyo Laoag kenni Peralta ket naglikudan na nga aglaklako daytoy ti droga.
Inadmitir met ni Peralta a nagusar isuna idi ti droga ngem nabayagen nga insardeng na daytoy.
Naamoan a ni Peralta ket nabayagen a sipsiputan dagiti kameng ti PNP.
Iti agdama ket nagtalinaed ni Peralta iti kustudiyar ti PNP-Laoag.
