LAOAG CITY – Inbatad ni Mr. Edward Dalo, maysa kadagiti jeepney driver iti ruta a Laoag-Batac-Paoay nga awan ti mabalbalinan da iti agtultuloy a panagngato ti presyo dagiti produkto a petrolyo.
Segun kenni Dalo, ti laeng kuma kalikagom da a maipatungpal ket maipangato met ti plete tapno adda ti mabati iti mapasadaan da a para iti pamilya da.
Inlawlawag na a no dadduma ket nakurang pay a lima gasot a pisos ti maiyawid da para iti pamilya da a drivers nangruna ita a panawen ket bassit ti pasaheros gapo ta bakasyon dagiti estudyante.
Kunana nga adda man pasaheros wenno awan ket masapol nga agbiyahe dan gapo ta sumaruno met nga agkarga dagiti nakapila.
Mainaig iti daytoy, kuna ni Dalo a dakkel met a tulong kadakuada ti ipapaay ti gobierno kadakuada kas iti fuel subsidy.
Kabayatanna, mangnamnama met ni Dalo a bumaba ti presyo dagiti produkto a petrolyo tapno saan da a kakaasi.
