LAOAG CITY – Nagballigi dagiti otoridad a nangtiliw iti maysa a lalaki a drug surrenderee ken maibilang kas Street Level Individual iti naiyuswat a drug buy-bust operation iti paset ti Sitio Badbadoc, Barangay Barcelona iti ili ti Solsona.
Binigbig ni Police Capt. Randy Damo, ti chief of police iti ili ti Solsona ti subject ti operasyon a ni Whelan Baraoidan y Ruiz, agtawen ti 40, naasawaan, awanan ti trabaho ken residente iti Barangay Maananteng iti metlaeng nadakamat nga ili.
Inbatad ni Damo a tiniliw da a dagus ti suspek kalpasan a naglako ti maysa a sachet a naglaon ti maipagarop a shabu iti nagpammarang a police poseur buyer.
Iti pannakakapkap ti suspek ket nakakumpiskar pay dagiti otoridad ti tallo a sachet a naglaon metlaeng ti maipagarop a shabu ken ti sangaribo a pisos a nausar iti operasyon.
Karaman pay kadagiti nakumpiskar iti ikot ti suspek ket ti maysa a lighter, maysa a pedaso ti improvised glass tooter tube, maysa nga unit color beige Toyota Innova ken ti walo gasut a pisos a personal a kwarta na.
Inpakaammo ni Damo a mapatta-patta a sumuruk-kumurang a 7,800 a pisos ti balor dagiti nakumpiskar a maipagarop a shabu manipod iti nasao a suspek.
Mainaig iti daytoy, kuna ni Damo nga isagsagana dan dagiti kasapulan a dokumento para iti pannakaipila ti reklamo kontra iti suspek.
Kabayatanna, nagballaag ni Damo kadagiti residente iti ili ti Solsona nga adda ti illegal nga aktibidad na nga agtultuloy ti panangpaiget da ti kampanya da kontra iti illegal a droga.
