LAOAG CITY – Inpasingked ti Department of Social Welfare and Development nga aramiden na amin tapno masolusyunan ti problema seknan ti nakaro a panagbisin iti Pilipinas.
Inaramid daytoy ti ahensya kalpasan ti nagbalin a resulta ti kaudian a survey ti Social Weather Station a naiyuswat idi Marso 21 agingga iti Marso 25, 2024 a nangipakita a ngimmato ti 14.2% ti bilang dagiti pamilya a Pilipino nga agpaspasar ti nakaro a panagbisin ken awan ti makan a taraon iti pagilian.
Segun ken ni Department of Social Welfare and Development Spokesperson Assistant Secretary Irene Dumlao, daytoy ti target a masolusyonan ti Walang Gutom 2027 food stamp program a gagem na a solbaren ti food insecurity ken ti panagbisin dagiti Pilipino.
Kuna na nga adda ti dua nga objectives ti nasao a programa no sadinno a ti umuna ket ti mangkissay ti bilang dagiti Pilipino nga agpaspasar ti involuntary hunger ken malnutrition, idinto a ti maikadwa ket matulungan dagitoy a maaddaan ti trabaho, panagsanay, wenno kabaelan tapno agbalin a pakairanudan a miembro ti komunidad.
Iti babaen ti nasao a programa ket makaawat dagiti benepisyaryo ti electronic benefit transfer card a naglaon ti Php3,000 a balor ti food credits a maipaay kadakuada iti kada bolan.
Daytoy ket mabalin nga usaren dagiti benepisyaryo tapno igatang ti kanen da manipod kadagiti tianggi nga accredited ti Department of Social Welfare and Development kas ti Kadiwa stores.
Nupay kasta, tapno agbalin a kwalipikado iti nasao a programa ket masapol a dumalan dagiti benepisyaryo iti nutrition sessions sakbay a maipaayan da ti nasao a card.
Kabayatanna, iti agdama ket agtultuloy ti maiyus-uswat a pilot implementation ti Walang Gutom 2027 Food Stamp Program ti Department of Social Welfare and Development nga agdama nga addaan ti 2,300 a benepisyaryo a naggapo iti maysa a milyon nga households dagiti Pilipino a naestablisar a karaman iti poorest of the poor manipod iti Tondo, Maynila; San Mariano, Isabela; Dapa, Siargao; Garchitorena, Camarines Sur; ken Parang, Maguindanao.
