LAOAG CITY – Inbatad Department of Social Welfare and Development (DSWD) Secretary Rex Gatchalian nga in-inut a palpalawaen ti ahensia ti panagusar ti digital channels iti panangibunong ti ayuda ngem agtalinaed a parikut ti kinaawan ti bank account ti kaadoan a benepisiario.
Segun ken ni Gatchalian a fully digital ti payout iti Walang Gutom Program ken 4Ps kabayatan a maisayangkat pay laeng ti digitalization ti sumagmamano a social protection programs kas ti Assistance to Individuals in Crisis Situation (AICS), pakairamanan ti Unified Package for Livelihoods, Industry, Food, and Transport wenno UPLIFT.
Iti Unified Package for Livelihoods, Industry, Food, and Transport (UPLIFT), inpaganetget ti sekretario a gagemna daytoy nga agbalin a digital payout para iti 2.5 million a benepisiario.
Nupay kasta, basar iti naiyuswat a validation a 20% laeng kadagitoy ti adda bank account-na.
Gapu iti daytoy, nakibinnulig ti ahensia iti Bangko Sentral ng Pilipinas wenno BSP tapno ma-enroll dagiti kaadoan a benepisiario kadagiti bank account ken tapno in-inut a maisayangkat ti digital distribution ti ayuda.
Kabayatanna, inbatad ni Bulacan 6th District Representative Salvador Pleyto a napateg nga ikonsiderar dagiti benepisiario nga awan bangko, smartphone wenno internet tapno saanda a maibati iti panagakar iti digital payout system.
