LAOAG CITY – Dinadael dagiti pannakabagi ti Department of Trade and Industry (DTI) ditoy probinsya babaen ti panangidaulo ni Provincial Director Charrie Qoudala dagiti nakumpiskar da a Christmas light itay napan a tawen 2018.
Segun kenni Qoudala, umabot iti 124 a karton dagiti Christmas light ti nakumpiskar da bayat ti inspeksyon da kadagiti nagduduma a pagtagilakoan itay napan a tawen.
Inbatad na a no mapalubusan dagitoy a mailako kadagiti gumat-gatang ket posible a mangitunda ti pannakadesgrasya dagiti maseknan gapu ta substandard dagiti materyales a nausar iti pannakaaramid dagitoy.
Kabayatanna, naragsak ni Qoudala gapu ta awan ti nakumpiskar dagiti kameng ti DTI a substandard a christmas light bayat ti panaginspeksyon da idi kalman.
Mangnamnama ni Quodala a naadalanen dagiti negosyante gapu ta no kumpiskaren da dagitoy ket dakdakkel ti lugida.
