LAOAG CITY – Inalay-ayan ti Department of Trade and Industry (DTI) ti panagamak ti publiko nga adda ti posible a panagngato iti presio ti sardinas iti merkado.
Inbatad ni Department of Trade and Industry Secretary Cristina Roque, awan ti kinapudnona ti agwarwaras nga espekulasion mainaig iti price increase.
Immuna iti daytoy, rimmuar ti report a kiniddaw ti Southern Philippines Deep Sea Fishing Association ti panagngato ti presio ti 155-gram a lata ti sardinas manipud P15 agingga P31.
Nupay kasta, inlawlawag ti Department of Trade and Industry nga awan pay ti opisial a panagsinnarita wenno panagkiddaw manipud iti aniaman a canning company.
Naikeddeng pay laeng ti panagtataripnong ti ahensia kadagiti manufacturer inton weekend.
Maipalagip nga inanunsio ti Department of Trade and Industry nga inyalud-odna agingga Mayo 10 ti panangipatungpal ti price freeze kadagiti kangrunaan a magatgatang.
