LAOAG CITY – Naisalakan dagiti dua a babbai a taga Nueva Ecija ken Aurora nga agtawen ti 18 ken 24 manipod iti pagtrabtrabahoan da iti asideg ti Discolandia iti Barangay 1, ditoy ciudad ti Laoag.
Segun kenni Konsehal Marvin Pascua iti ili ti Solsona, nagkamang iti konseho ti kabagyan ti maysa kadagiti biktima tapno agkiddaw ti tulong.
Gapu iti daytoy, nakikoordinar ni Konsehal Pascua iti Philippine National Police ditoy ciudad ti Laoag tapno isu ti kadwa da a mapan mang-rescue kadagiti biktima.
Inpakaammo ni Pascua a ti tulagan dagiti biktima ken ti nangrecruit kadakuada ket mapan da agtrabaho kas agtagibalay iti Cabanatuan City.
Nupay kasta, saan a ninamnama dagiti biktima a manipod iti Cabanatuan City ket naibiyahe da ditoy ciudad ti Laoag no sadinno a naikabil da iti asideg ti Discolandia.
Rumrumuar a saan a nasurot ti katulagan a ti laeng trabaho dagiti biktima ket agtagibalay gapu ta maipagarop a mamanmandar pay ti ub-ubing nga agpai-table.
Iti panagturong da Pascua kadwa na dagiti kameng ti pulisya ditoy ciudad ket nagballaigi da a nangisalakan kadagiti biktima no sadinno a ti rumrumuar a rason no apay a dida palubusan dagitoy a pumanaw ket maipagarop nga adda ti binale da a kwarta.
Kabayatanna, naglikudan amin ni Mr. Tomas Guevarra, agtagikua iti Club a nagtrabahoan dagiti na-rescue a dua a babai dagiti alegasyon dagiti biktima.
Inpaganetget na a sakbay nga innala na nga agtrabaho kenkuana dagiti biktima ket napanna personal a kinasarita a mismo dagiti nagannak da iti bukod da a lugar.
Inadmitir ni Guevarra a natungpa na ti ub-ubing gapu ta adda ti saanna a kinayat nga inaramid na.
Naamoan a dagiti dua a biktima ket tallo nga aldaw da paylaeng nga agtrabtrabaho kenkuana idi napan innala dagitoy dagiti otoridad a pakairamanan ni Konsehal Pascua.
