LAOAG CITY – Nasakit ti nakem dagiti dua a babai iti maipagarop a saan a napintas a trato kadakuada dagiti sumagmamano a kameng ti pulisya ditoy ciudad ti Laoag.
Iti eksklusibo nga interview ti Bombo Radyo Laoag ken ni Cristel Paragatos, taga Barangay 7-A ditoy ciudad ti Laoag, inyistorya na a napan da naginom ti kadwa na a pada na met laeng a babai iti maysa a paginoman iti asideg ti maysa a telecommunication company ditoy ciudad.
Kuna na nga iti panagawid da koman ket adda dagiti nakatambay a menor de edad a babbai iti pagnaan da ken nagibarsak ti bote.
Inbatad na nga iti panagtalyaw da ket maipagarop a kellaat lattan a napan dinarop ida dagiti dua a menor de edad a babbai ken pinungot-pungot da ti kadwa na.
Ginandat na nga anawaen dagiti dimmarop kadakuada ngem uray isuna ket inramraman da a pinungot.
Inpalgak ni Paragatos nga idi adda ti dimteng a sumagmamano a pulis ket inbaon da dagitoy a mapan iti kwerpo ti pulisya tapno isu ti pagsasaritaan da.
Nupay kasta, idi adda dagitoy iti kwerpo ti pulisya ket inbatad ti maysa a pulis a mapukpukaw ti cellphone na ken inukag da dagiti bag da ngem awan ti nakita da.
Mainaig iti daytoy, nasdaaw da Paragatos gapu ta awan ti maysa a babai a nakariri da isut gapuna a dinamag na kadagiti pulis no ayanna ti maysa a babai.
Maipagarop nga insungbat ti maysa a pulis a maymaysa ti nakariri da ken gapu ta nakainom da ti nasanger ket inkabil da dagitoy iti selda, ngem gapu ta nagriri da ket pinaruwar da met laeng ida nga arigna awan ti aniaman na.
Inadmitir ni Paragatos nga aggaammo da met laeng kadagiti nakariri da ken adda ti nabayag a susik da gapu iti lalaki.
Innayon ni Paragatos a ti kasakit ti nakem da ti kadwa na ket maipagarop a saanda a pulos a naikkan ti gundaway a nakapagpalawag ken saan nga inrekord dagiti maseknan a kameng ti pulisya ti napasamak iti baet a nadangran da babaen kadagiti dua a menor de edad a pada da met laeng a babbai.
Rumrumuar a ti nakaduty a desk officer iti dayta a gundaway ket ni Police Master Sergeant Jonel Mangapit.
Kabayatanna, inlawlawag ni Police Lt. Col. Amador Quiocho, ti chief of police ditoy ciudad ti Laoag, a saan a naiyaramidan ti incident report ti napasamak gapu ta maipagarop a saan nga agsusurot ti ibagbaga dagiti maseknan a babbai.
Inpasigurado na a naala da ti nagan dagiti maseknan tapno mai-schedule ti panagsasarita da.
