LAOAG CITY – Inpakaammo ni P/Capt. Jackson Sugayen, Hepe ti Paoay Municipal Police Station nga adda ti dua a baka a mapukpukaw ti pinarti ti tallo a lallaki iti Barangay 2 San Roque ken Barangay 4 Laoa iti ili ti Paoay.
Segun kenkuana, dagiti akinkukua ti naparti a baka ket maysa a residente ken Kapitan iti Barangay 2 iti nasao nga ili.
Inbatadna a ti maysa kadagiti suspek ket taga Barangay 20 Paratong iti ili ti Paoay idinto a dagiti dua ket taga probinsia ti Cagayan.
Inlawlawagna nga apaman a naparti dagiti suspek ti dua a baka ket ilakoda dagitoy idinto a dagiti dadduma ket pagbibingayanda.
Kunana a basar iti naun-uneg nga imbestigasionda ket nabayagen a kastoy ti ar-aramiden dagiti suspek ken dakkel ti posibilidadna nga isuda ti adda iti likudan ti kapada a kaso kadagiti dadduma a lugar.
Innayonna a dumanon iti 40 a ribu a pisos ti balor ti maysa a baka nga adda ti pakabuklan a 80 a ribu a pisos.
Kabayatanna, mapilaan dagiti suspek iti kaso gapu iti panaglabsing dagitoy iti Cattle Rustling.
Iti agdama, nagtalinaed iti pagbaludan ti maysa kadagiti suspek iti panangparti kadagiti dua a baka.
