LAOAG CITY – Natay ti dua a Chinese nationals kalpasan ti suicide bombing a napasamak idiay Pakistan.
Inbatad dagiti otoridad iti Pakistan a ti suicide attack ket napasamak a mismo iti Karachi airport idiay Pakistan.
Malaksid kadagiti dua a natay ket adda pay sangapulo nga indibidual a nasugatan.
Patien dagiti otoridad a ti maysa a bangkay a narekobre da ket maysa kadagiti suspek.
Kinuna ti embahada ti China idiay Pakistan a ti insidente ket maysa a kita ti “terrorist attack” a nangpuntiria iti convoy dagiti Chinese engineers nga agtartrabaho iti power project iti Sindh province.
Inadmitir met ti Balochistan Liberation Army (BLA) a ti nadakamat nga insidente ket inwayat ti Shah Fahad group.
