LAOAG CITY – Natiliw dagiti dua a construction worker babaen iti naiyuswat nga anti-illegal drug buy-bust operation iti ili ti Bangui.
Nabigbig dagiti suspek nga isuda Alyas Cabel, agtawen ti 48, residente iti Barangay Lanao iti ili ti Bangui ken ti agtawen ti 49, naasawaan ken residente iti Luna, Apayao.
Naarestar dagitoy kalpasan a maipagarop a naglako ti maysa a sachet ti maatap a shabu.
Nakumpiskar pay kadagiti suspek ti tallo a sachet ti maipagarop a shabu, drug paraphernalia kas iti drug tube tooter ken dadduma pay.
Naamoan a naala pay iti ikot ni Alyas Cabel ti buy-bust money, pakete ti sigarilyo ken maysa a sachet a naglaon met laeng ti maatap a shabu.
Inbatad met dagiti otoridad a dagiti suspek ket maibilang nga street level individuals.
Kabayatanna, maisagsaganan ti kaso a maipila kontra kadagiti suspek a panaglabsing iti Republic Act 9165 wenno Comprehensive Dangerous Drugs Act of 2002.
