LAOAG CITY – Naarestar dagiti dua a lallaki gapu iti panaglabsing da ti maipatpatungpal nga Enhanced Community Quarantine (ECQ) partikular ti curfew gapu iti covid-19 ditoy ciudad ti Laoag iti oras ti alas-11:45 idi rabii.
Nabigbig dagitoy Nathaniel Joseph Macalso Manuel, agtawen ti, agtawen ti 44, awanan ti asawa, tricycle driver, residente iti Barangay 7-a ditoy ciudad ti Laoag ken ni Ryan Oliver Gutierrez Lorenzo, agtawen ti 33, security guard, taga Aglipay, Quirino Province ngem agdama nga agnanaed iti Barangay 11 ditoy ciudad.
Basar iti report, kabayatan ti panagpatrolya dagiti kameng ti pulisya ket nakita da dagiti dua a magmagna iti oras ti alas-11:45 idi rabii iti baet ti maipatpatungpal a curfew.
Sinita dagiti pulis dagiti dua gapu iti kaadda da pay laeng iti ruwar iti baet nga adda ti curfew gapu iti ECQ.
Nupay kasta, maipagarop nga insungbat dagiti suspek ti “Apay narigat lang aya nga inkam makiinom, agawid kami a no kaykayat mi? Awan met madi nga ub-ubraen mi”.
Gapu iti daytoy, inarestar dagiti pulis dagiti suspek ken inpan da nga immuna iti ospital tapno maeksamen dagitoy, ket nagpositibo da iti nasanger.
Iti agdama, nagtalinaed dagiti suspek iti kustodyar ti PNP kabayatan ti pannakaisagsagana ti maipila a reklamo a Resistance and disobedience to a person in Authority kontra kadakuada.
