LAOAG CITY – Kinumpirmaran ni Police Lt. Norman Pentang, chief of police ti PNP-Banna nga adda ti dua a lallaki a nanglipak iti maysa a tricycle driver iti nasao nga ili.
Binigbig na ti biktima a ni Randolf Bacsa a taga Barangay Valenciano iti nasao nga ili ken dagiti suspek a da Jeric Balino ken ni Elric Bangkil, residente iti Barangay Hilario iti met laeng nasao nga ili.
Segun kenni Pentang, basar ti palawag ti biktima ket napan laeng nag-burger idi napan met dagiti suspek ken napagtripan da a linipak ni Bacsa iti namin-ado a daras.
Gapo iti daytoy, nagsagaba ti gasgas iti paset ti ulo ti nadakamat a biktima.
Mainaig iti daytoy, inlawlawag ni Pentang a basar kadagiti kabarangayan ti biktima ket saan met a naluko iti lugar da daytoy.
Nupay kasta, kuna ni Pentang a naiyendorso iti barangay ti nasao a pasamak.
Kabayatanna, nagpanawagan ni Pentang iti publiko a makakita iti nagduduma nga insidente nga itawag iti PNP tapno makaresponde da a dagus.
