LAOAG CITY – Inistorya dagiti dua a menor de edad iti Barangay Pasil iti ili ti Paoay no kasano ti mapagarop a panangdangran kadakuada ti agnagan ni Jovencio Galdiano.
Segun iti agtawen ti 18 a biktima, idi bulan ti Mayo kabayatan ti panagbasketball da ket dinamag ni Galdiano no isuna ti nangpukan iti kawayan na, ken inbatad ti ubing a saan nga isuna ken iniseman na daytoy.
Gapo iti daytoy ket iniggaman ni Galdiano ti teltel na ken indumudom na iti kawayan nga alad.
Inbatad met ti agtawen ti 16 a biktima nga itay laeng napan a lawas ket maipagarop a dinangran met isuna ni Galdiano.
Inlawlawag na a mapan na alaen ti insentibo na para iti guling-guling iti balay ni Barangay Chairman Roy Saducos ngem kuna ti kapitan nga urayen da ti treasurer.
Inbaga na nga idi agawid kuman ket nakita na ni Galdiano iti likod ti balay ti kapitan ken iniseman na daytoy ngem maipagarop a binekkel ni Galdiano isuna ken ginuyod na ti bado na ken inkabil na ti ubing iti sangwanan ti kapitan.
Kunana pay nga adda dagiti naganawa kenni Galdiano ngem saan na nga ikaskaso dagitoy.
Innayon dagiti dua a menor de edad a saan da nga ammo no anya ti nakabasolan da kenni Galdiano.
Mainaig iti daytoy, inbatad ti ina ti agtawen ti 16 a biktima a ni Mrs. Evangeline Colobong nga awan pay ti nagsasaritaan da seknan iti nasao a pasamak idinto a ti napasamak iti agtawen ti 18 ket nagsasarita da iti barangay.
Inbatad ti ina ti agtawen ti 18 a ti nagbalin a palawag ni Galdiano ket nainsulto idi iniseman isuna ti biktima a menor de edad.
Kabayatanna, inlawlawag ni Barangay Chairman Roy Saducos iti Barangay Pasil iti ili ti Paoay a naaramid ni Jovencio Galdiano ti maipagarop a nangdangran kadagiti dua a menor de edad gapo iti pungtot na.
Daytoy ti nagbalin a palawag ni Galdiano bayat ti panagsasarita da kalpasan ti maipagarop a pannakadangran ti agtawen ti 18.
Inbatad na nga idi nagdamag ni Galdiano no siasinno ti nagpukan iti kakawayanan ket nagkatawa ken saan a simmungbat ti ubing, ken idi inulit na ti nagsaludsod ket nagisem laeng isut gapo na a nakapungtot.
Kuna ti kapitan nga idi dinamag na kenni Galdiano no apay a ti teltel ti ubing ti ginammatan na ket inbaga ti lalaki nga idi adda iti serbisyo kas maysa a marine ket kastoy ti panag-training da ken natalged para iti maysa a tao ti inaramid na.
Kabayatanna, kuna ti kapitan nga idi mapan alaen ti agtawen ti 16 ti insentibo na iti balay da ket binagaan na nga agsubli tapno mangala iti asawa na ti kwarta gapo ta naibusen ti nagkokontribusyonan da nga opsiyal.
Nupay kasta, kunana a nakita na ginammatan ni Galdiano ti teltel ti ubing, ken ginuyod na ti ima na nga inkabil iti sangwanan na ken inbatad na iti kapitan a kitaen na dagiti awan ti sursuro na nga ubbing.
Kuna ti kapitan nga inbaga na kenni Galdiano nga ibbatan na ti ubing ken kasarita na a nasayaat.
Mainaig iti daytoy, kuna ni Saducos a binalakadan na dagiti nagannak ti ubing a mapan agreport iti barangay tapno maiyaramidan ti blotter ken tapno mapaayaban ni Galdiano ngem nadamag na a nagsasarita dan iti biang ti PNP.
Innayon ti kapitan a ti nagbalin pay a rason ni Galdiano ket panagdisiplina na laeng kadagiti ubbing ti inaramid na gapo ta arig na katkatawaan da isuna.
