LAOAG CITY – Nagsagaba ti sugsugat kadagiti nagduduma a paset ti bagi dagiti dua nakalugan ti motorsiklo kalpasan a nakadinnungpar da iti maysa a kotse iti paset ti Brgy. Brgy. 2 Anao iti ili a Piddig.
Nabigbig dagitoy a da Rafael Daleg y Dolig, addaan iti umno nga edad, construction worker ken residente iti Brgy. Sta. Maria iti nasao nga ili ken ti lubbon na a ni Joemar Malana y Duleg, agtawen ti 34, awanan asawa ken residente iti sitio 6 iti ili a Carasi idinto a ti driver ti kotse ket ni Flora Faey Domingo y Bartolome, agtawen ti 32, awanan asawa, mangisursuro iti Piddig South Central Elementary School ken residente iti Brgy. 3 Loing, Piddig.
Basar iti imbestigasyon ti PNP Piddig, agpadpada nga agpapaabagatan a direksyon dagiti dua a lugan idi ta maipagarup a bigla nga agpannakannawan a direksyon ti kotse rason a nadungpar daytoy ti motorsiklo iti likod a paset na.
Gapu iti daytoy nasugsugatan dagiti nakamotorsiklo rason a naitaray dagitoy iti Piddig District Hospital idinto a saan met a naan-ano ti driver ti kotse.
Naamoan nga adda ti impluwensya ti nasanger dagiti nakalugan iti motorsiklo ken saan dagitoy a nakasuot ti helmet.
