LAOAG CITY – Nagdinnungpar ti dua a nakamotorsiklo iti Brgy. Abaca iti ili ti Bangui, sumagmamano nga oras sakbay iti panangsarabo ti baro a tawen.
Nabigbig ti driver ti motorsiklo nga Honda Click 125 a ni Rodel Acebedo y Ramos, agtawen ti 42, naasawaan ken residente ti Brgy. Abaca iti ili ti Bangui idinto a nabigbig met ti nangiturong ti maysa pay a motorsiklo a Suzuki Raider FI 150 a ni Joshua Magana y Talania, agtawen ti 19, awanan asawa ken residente ti Brgy. Masikil iti nasao nga ili.
Basar iti Bangui Municipal Police Station, kabayatan a dumaldalyasat ti Honda Click 125 ket kellaat daytoy a nag-left turn a nangitunda ti panagdinnungparda iti Suzuki Raider FI 150.
Naammoan iti imbestigasion nga agpada a nabartek dagiti dua a nakamotorsiklo idi napasamak ti desgrasia.
Gapu iti daytoy, natukkol ti akin-kannawan a luppo ken nagasgasan ti rupa ni Acebedo idinto a natukkol met ti akin-kannigid nga abaga ni Magana nga agpada dagitoy a naitaray iti Bangui District Hospital ngem ti driver ti Honda Click 125 ket naiyakar iti Mariano Marcos Memorial Hospital and Medical Center para iti naan-anay a pannakataming.
Kabayatanna, naammoan nga agpada a saan a nakasuot ti protective helmet dagiti dua a nakamotorsiklo idi napasamak ti insidente.
