LAOAG CITY – Umabot iti P98 a ribo a pisos ti balor dagiti nadadael iti pannakauram ti dua a pasdek iti Barangay Saud iti ili ti Pagudpud.
Daytoy ti inpakaammo ni Fire Supt. Nemesio Valenciano Jr., ti acting provincial fire marshal iti Ilocos Norte.
Kunana nga iti agdama ket agtultuloy iti isaysayangkat da nga imbestigasyon tapno maamoan ti pakabuklan a balor dagiti nadadael kalpasan ti insidente.
Inbatad na a dagiti nauram a dua a pasdek ket maysa a commercial ken maysa a residential building.
Inpakaamo na nga apaman a naidanon daytoy nga insident iti Bureau of Fire Protection iti ili ti Pagudpud ket insigida da a nagresponde babaen ti dua a fire truck ken nasebseban da ti apoy kalpasan iti 5 a minutos.
Kabayatanna, basar iti impormasyon a nakalap ti news team ti Bombo Radyo iti Ilocos Norte Police Provincial Office, ti apoy ket namunganay iti maipagarop a nabaybay-an a nakasaang nga stainless steel deep fryer pan.
Rumrumuar nga idi sinublianan ti empleyado manipod iti commercial building ket napigsan ti apoy no sadinno a pinadas na a sebseban ngem alisto a nagkayamkam gapu iti kinapigsa ti angin.
