LAOAG CITY – Inpasingked ni Barangay Chairman David Pascua iti Barangay 23, Sta. Cecilia iti ili a San Nicolas nga awan ti nakaro a rekord da Jeriel Ramos, agtawen iti 22 ken ni Leo Emil Casabay, agtawen iti 19 iti barangay da.
Inbatad na a ti laeng pakairamramanan dagiti dua ket no agririri da no aggaayam da ti basketball iti mismo a barangay da.
Da Ramos ken Casabay ket maak-akusaran a nangrames ti maysa a babai iti paset ti Barangay 7 iti ili ti Sarrat ken iti panangkapkap kadakuada dagiti otoridad ket adda ti naala da iti wallet ni Ramos a dua a sachet a naglaon ti maipagarop a shabu ken napagango a bulong ti marijuana.
Immunan nga inadmitir ni Casabay a naaddaan da idi ti relasyon iti nasao a babai ngem nagpaot laeng iti lima nga aldaw.
Kabayatanna, inpetteng met ti ina ni Ramos a saan nga agus-usar iti illegal a droga ti anak na.
Mamati a ti naala nga illegal a droga iti wallet ti anak na ket adda laeng ti nangipan.
Mainaig ti daytoy, inpasigurado ti katugangan a babai ni Casabay nga awan pay ti madi a rekord ti manugang na iti barangay da.
