LAOAG CITY – Napilaanen ti kaso a panaglabsing ti Republic Act 10591 wenno Comprehensive Firearms and Ammunition Regulation Act ken ti Republic Act 9165 wenno ti Comprehensive Dangerous Drugs Act of 2002 dagiti agasawa a natiliw iti naisayangkat a search operation iti ili ti Badoc.
Ti operasyon ket nagbibinnuligan nga inyuswat dagiti kameng ti Police Intelligence Unit (PIU), Regional Drug Enforcement Unit 1 (RDEU 1), Regional Intelligence Division, Police Regional Office 1 (RID PRO1), ken ti Philippine Drug Enforcement Agency (PDEA) Region 1.
Basar iti Philippine National Police iti ili ti Badoc, dagiti suspek ket agtawen ti 35 a lalaki, ken ti asawa na nga agtawen ti 34 a babai, nga agpada a nailista kas PDEA Top 7 Provincial Level, ken agpada dagitoy a residente iti nasao nga ili.
Immunan a nakarekobre dagiti otoridad ti tallo a pedaso ti heat-sealed transparent plastic sachets a naglaon ti maipagarop a shabu, a mapatta-patta nga agdagsen ti sumuruk-kumurang a 13.58 grams, ken agbalor ti P76,048.00; maysa a bassit a box a naglaon ti bala para iti Caliber .22 firearm; 28 a pedaso ti bala para iti Caliber .22 firearm; maysa a black sling bag; maysa a Glock Gen 5 Caliber 9mm pistol; maysa a magazine para iti Caliber 9mm firearm; 7 a pedaso ti bala para iti Caliber 9mm firearm; maysa a black pouch ken sumagmamano a drug paraphernalia.
Iti agdama, nagtalinaed dagiti suspek iti Philippine National Police iti ili ti Badoc.
