LAOAG CITY – Sumango ti konduktor ti bus iti kaso a grave threat ken panaglabsing iti Republic Act No. 10591 wenno ti Comprehensive Firearms and Ammunition Regulation Act gapu iti maipagarup a panangtutukna ti airsoft gun iti bus driver iti Barangay 10 ditoy siudad ti Laoag.
Nabigbig ti biktima a ni Mark Anthony Gaviola Serado, agtawen ti 44, naasawaan, bus driver ken residente ti Barangay Macupit iti ili ti Bacarra idinto a nabigbig ti suspek a ni Jeffrey Albano Guzman, agtawen ti 31, awanan asawa, bus conductor ken residente ti Barangay Poblacion 1 iti ili ti Pagudpud.
Basar iti Laoag City Police Station, kabayatan a mangiwaywayat ti mobile patrolling dagiti otoridad iti paset ti Gov. Primo Lazaro Street ket adda ti naawatda nga impormasion manipud iti maysa a concerned citizen nga adda ti riribok iti sango ti gasoline station.
Insigida a nagturong ti kapulisan ken nangiwayat ti naan-anay nga imbestigasion.
Inbatad ti biktima a maipagarup a tinutukan isuna ti suspek ti paltog ken pinangtaanna daytoy a papatayen.
Intudo ti biktima kadagiti pulis ti nangilemmengan ti suspek iti inusarna a paltog no sadinno nga insigida a kinita dagiti pulis ti intudo ti biktima ket ditoy a narekobreda ti paltog nga addaan ti markings a CZ Shadow 2 9X19 iti driver’s seat a naduktalan a maysa nga airsoft gun.
Gapu iti insidente, nangitunda daytoy ti nairot a taray ti trapiko gapu ta nakaabbeng iti kalsada ti nagluganan a bus ti suspek.
Naiturong ti biktima ken ti suspek iti kuerpo ti pulisia para iti naun-uneg nga imbestigasion.
Inarestar dagiti otoridad ti suspek ken apaman a kinitada ti sling bag daytoy ket nakita ti maysa a bala ti Cal. .45.
Nagtalinaed iti Laoag City Police Station ti suspek a sumango iti maiyannatop a pannusa.
