LAOAG CITY – Natukkol ti saka ken nagsagaba ti sugsugat dagiti dua nga indibidual a karaman iti napasamak a degsrasya iti paset ti Barangay Nagbacalan iti ili ti Paoay.
Segun ken ni Police Capt. Eddie Suyat, ti chief of police iti ili ti Paoay, naperdian ti kurung-kurung a nagluganan da Ariel Diza, Francis del Rosario, Joseph Recto ken Victor Temporal , agpapada a taga ditoy ciudad ti Laoag.
Gapu iti daytoy, induron da ti nasao a kurung-kurong ngem ditoy metten a maipagarop a nadungpar ida ti Honda Civic nga inturong Alejandro Cristobal, empleado iti National Tobacco Administration iti ciudad ti Batac, taga Barangay 38, Mangato ditoy ciudad ti Laoag.
Inbaga ni Suyat a basar iti imbestigasyon da ket napaspas ti taray ti kotse isut gapuna a naipurwak pay dagiti biktima iti 20 agingga iti 50 a metro manipod iti kurung-kurung.
Saan pay a maibaga ni Suyat no nakainom ti nasanger ti driver ti Honda Civic.
Naitaray dagiti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakataming da.
