LAOAG CITY – Nakasubbot itan ti World Number 4 ken Asian champion pole vaulter EJ Obiena kalpasan a nagun-odna ti balitok a medalya iti Orlen Copernicus Cup a naisayangkat idiay Torun, Poland.
Nakaaramid ti two-time Olympian ti 5.80 meter clearance a nangidaulo kadagupan kadagiti siam a nakipaset.
Adda iti maikadua a puesto ti pambato ti Poland a ni Piotr Lisek a nakairekord laeng ti 5.70 meter.
Adda met iti maikatlo a puesto ni Sondre Guttormsen ti Norway.
Daytoy ti maikadua a balitok a medalya a nagun-od ni Obiena nga iti immuna ket ti Metz Moselle Athletor iti France iti napalabas a bulan.
Kabayatanna, daytoy ti panangsubbotna kalpasan a nagleppas laeng iti maikapito a puesto kadagiti walo nga umaayam iti ISTAF Indoor tournament a naisayangkat iti Dusseldorf, Germany.
