LAOAG CITY – Inanunsio ti Department of Energy (DOE) ti isasangpet ti pakabuklan a 178 minilyon a litro ti diesel kas paset ti addang ti gobierno tapno patibkeren ti suplay ti langis iti baet ti agtultuloy a rinnupak iti Middle East.
Segun iti Department of Energy, ti maudi a shipment ti nangkumpleto iti uppat a kargamento iti babaen ti Executive Order No.110 nga inruar ni Presidente Ferdinand Marcos Jr. tapno protektaran ti ekonomia kontra iti pabaliw-baliw a presio ti langis iti world market.
Inbatad ni Energy Secretary Sharon Garin ti balligi a delivery nga indauloan ti Philippine National Oil Company-Exploration Corporation (PNOC-EC) ket pammaneknek ti insigida a tignay ti gobierno tapno maipasigurado ti umdas a suplay ti petrolyo iti pagilian.
Naipaay dagiti shipments kadagiti kangrunaan nga hub idiay Batangas, Subic ken Davao tapno maaddaan ti umdas a suplay kadagiti nagduduma a paset iti pagilian.
