LAOAG CITY – Sagsaganaanen ni Karl Eldrew Yulo ti Asian Gymnastics Junior Championships ken Junior World Championships ita a tawen.
Inbatad ni Eldrew, inaldaw ti panagsanayna uray awan ti coach-na a ni Munehiro Kugimiya nga isu ti nangisuro met iti kabsatna a ni Carlos Yulo.
Kalpasan ti naimballigian a training daytoy idiay Japan idi Oktubre, manamnama nga ilaban ni Eldrew ti titulona iti vault apparatus ti Asian Junior Championships idiay South Korea manipud inton Hunio 12 agingga 16 ken sumaruno met ti Junior Worlds idiay Manila manipud inton Hulio 12 agingga 21.
Malaksid iti balitok a medalya iti vault iti Asian Championships idiay Uzbekistan, nagballigi isuna ti walo a balitok iti Chiu Wai Chung Cup idiay Hong Kong idi Disiembre.
Gapu iti daytoy, napadayawan isuna ti Special Citation iti 2024 PSA Awards Night.
Target dagiti agkabsat a Yulo nga agkadua a lumaban iti 2028 Los Angeles Olympics.
