LAOAG CITY – Isagsaganan ti Philippine National Police (PNP) ti emergency response team da para iti umadanin a panangrugi ti panawen ti tudtudo.
Iti maysa a rakurak, inbatad ni Philippine National Police chief General Jose Melencio Nartatez Jr. a manarimaanen ti pannakikoordinar dagiti police units kadagiti lugar nga alisto a malayos ken delikado iti panagreggaay ti daga, iti local disaster councils for planning on preemptive evacuation ken ti traffic management and rescue operations.
Segun pay iti PNP chief, agsagsagana metten ti nailian a pulisya ti quick reaction teams ken search-and-rescue units kadagiti lugar a masansan a maapektaran ti panaglayos ken bagyo.
Immunan nga inreport ti state weather bureau a mabalin a mangrugi ti rainy season iti maudi a paset ti Mayo wenno umuna a lawas ti Hunyo.
Mainaig iti daytoy, inpasigurado ni Nartatez a nakasagana dagiti personnel da a tumulong para iti rescue, evacuation ken humanitarian operations no kasapulan.
Maisagsagana metten ti police assistance desks tapno matulungan dagiti biyahero ken dagiti residente a maapektaran ti dakes a panawen iti rainy season.
Ginutigot met ni Nartatez ti publiko nga agtalinaed nga alerto, i-monitor dagiti opisyal nga abiso manipod iti weather bureau ken dagiti lokal nga otoridad ken sumurot iti evacuation protocols no kasapulan.
