LAOAG CITY – Sinuspenso ni Public Works Secretary Vince Dizon ti panagisuot ti uniporme dagiti empleado ti Department of Public Works and Highways iti baet ti agtultuloy nga imbestigasyon iti anomalya a flood control project.
Iti maysa a memorandum, inbatad ni Dizon nga amin nga opisyal ken empleado ti ahensya ket mapalubusan a saan pay laeng nga ag-uniporme agingga nga adda ti pammilin.
Inisyu ti sekretaryo ti memorandum gapo kadagiti mapaspasamak iti agdama.
Malaksid iti daytoy, iti maysa pay nga advisory, kuna ti ahensya nga inruar na ti direktiba tapno protehiran dagiti empleado manipud iti pannaka-bully ken harassment nga adda ti pakainagan na iti imbestigasyon iti maipagarop nga iregularidad kadagiti flood control projects.
Kabayatanna, immapela ni Dizon iti publiko a saan da nga ipada dagiti dadduma nga empleado ti ahensya kadagiti mairamraman iti maipagarop nga anomalya gapo ta ado latta dagiti napudno nga agserserbi.
