LAOAG CITY – Inlawlawag ni District Engr. Ma. Venus Torio iti 1st Engineering District ti DPWH no apay a nadelay ti sweldo dagiti empleado iti ahensya partikular iti maintenance department.
Segun kenni Torio, nadelay ti sweldo dagiti maseknan nga empleado gapo ti saan a dagus a pannakaipasa ti budget.
Nupay kasta, kuna ni Torio nga iti agdama ket nakasaganan dagiti sweldo dagiti empleado.
Inbatad na a maysa pay kadagiti rason ti narigat a pannaka-release ti kwarta ket gapo iti eleksyon.
Mainaig iti daytoy, kuna na a saan laeng nga ita ti ummuna a gundaway a naapektaran ti sweldo dagiti maseknan ngem ita laeng a nabayag sakbay a nai-release ti kwarta gapo iti midterm elections.
Sungbat daytoy ni Torio iti dimmanon a reklamo iti Bombo Radyo a sipud idi Abril 1 ket saan pay a naawat dagiti empleado iti ahensya ti sweldo da.
