LAOAG CITY – Pursigido ti gobierno probinsial ti Ilocos Norte babaen iti Environment and Natural Resources Office a mangiyammo kadagiti baro a nabutusan a barangay officials kadagiti programa ti probinsia nga adda pakainaigan ti aglawlaw kangrunaanna iti Solid Waste Management.
Segun ken ni Mr. Joegie Jimenez ti ENRO a daytoy ti kangrunaan nga ilawlawagna kadagiti pakaisaysayangkatan ti Barangay Newly Elected Officials program.
Inbatadna a babaen iti daytoy ket maammoan dagiti barangay officials no ania dagiti kangrunaan a programa ni Gob. Matthew Marcos Manotoc ken ti sibubukel a gobierno probinsial.
Malaksid iti daytoy, mamati ni Jimenez nga ad-adda pay a makatulong dagiti barangay officials no maikkan dagitoy ti bileg nga agiyisyu ti “citation ticket” kadagiti maduktalanda nga agpuur a kalugaranda.
Inannugotna a dakkel a problema agingga kadagitoy a gundaway ti panagpupuur iti nagdumaduma a paset ti probinsia.
Nupay kasta, kunana nga adu dagiti naawis nga agsarita iti Barangay Newly Elected Officials program rason a saanna a mailawlawag amin dagiti inpatungpalna a “best practices” iti nasayaat a pannakaiwanwan dagiti basura bayat a daytoy ti Punong Barangay iti Brgy. Poblacion iti ili ti Burgos.
Kabayatanna, naammoan a planona nga ikoordinar ken ni ABC Federated Pres. Ryan John Pascua ti pannakaisayangkat iti sabali a gundaway ti pannakailawlawag kadagiti barangay officials dagiti best practices iti nasayaat a pannakaiwanwan dagiti basura.
