LAOAG CITY – Kiniddaw ti Environmental Health Groups iti pagilian a Thailand kangrunaanna iti Food and Drug Administration ti naan-anay a tulong tapno malappedan ti panag-export kadagiti cosmetics nga addaan ti Mercury content iti pagilian.
Basar iti grupo, dagiti skin lightening products nga in-export iti pagilian ket addaan ti makasabidong a kemikal nga adda ti dakes nga epektona iti salun-at ti tao.
Ti pormal a surat ket inpatulod ti EcoWaste Coalition – Philippines, Ecological Alert and Recovery – Thailand (EARTH) ken International Pollutants Elimination Network – Southeast & East Asia (IPEN-SEA) iti Thai health authorities.
Nagpanawagan daytoy a grupo iti gobierno ti Thailand a pagsungbaten dagiti personalidad nga adda iti likudan ti exportasion ti negosio nga addaan ti Mercury content.
Inaramid ti grupo ti apela kalpasan ti pannakakumpiskar dagiti otoridad iti Pilipinas dagiti Made in Thailand skin lightening products a rumrummuar nga addaan ti mercury content.
Mailaklako dagitoy kadagiti e-commerce sites a target dagiti Pilipino a gumatang.
