LAOAG CITY – Nakaisubmitiren ti maysa a bus terminal a Laoag-Pagudpud-Bangui a napaserraan iti kallabes dagiti maiyannatop a dokumento iti Business Permit and Licensing Office ditoy siudad ti Laoag.
Segun ken ni Atty. Charito Malicad, mangidadaulo iti nasao nga opisina, nailawlawag iti maseknan a bus terminal a masapul a pirmaan nga umuna ni Mayor James Bryan Alcid ti lift order tapno naan-anay a mawaswas ti bileg ti closure order.
Inbatadna a masapul a makapasa ti maysa a negosio iti iwayat nga inspeksion ti Inspection Team a bukbuklen ti City Treasury Office, City Health Office, City Engineering Office, City Planning Office ken Bureau of Fire Protection tapno naan-anay a makaala dagitoy ti business permit.
Maipalagip nga adda ti uppat a pasdek negosio ditoy siudad a napaserraan iti kallabes.
Kabayatanna, inlawlawagna nga awan ti empleado ti opisinada nga agipagpagna wenno agiprosproseso kadagiti dokumento a makaapektar iti panangipadanon ti serbisio kadagiti umili.
