LAOAG CITY – Mangiparuk-at ti Executive Order (EO) ti lokal a gobierno ditoy ciudad ti Laoag mainaig iti pannakaipatungpal ti alert level 2 iti Ilocos Norte mangrugi intono bigat, nobyembre 8.
Daytoy ti inbatad ni Doctor Charito Malicad, ti City Information Officer ditoy ciudad ti Laoag.
Segun ken ni Malicad, ti alert level 2 ket naluklukay ngem ti Modified General Community Quarantine (MGCQ) gapu ta mapalubusanen a rumuar dagiti ubbing, nabakunaan man kontra iti covid-19 wenno saan.
Malaksid iti daytoy, napalubusan payen nga aglukat ti amusement wenno kids’ industry, sports ken dadduma pay a recreational activities ken venues.
Inbatad pay ni Malicad a gapu iti agtultuloy a panagbaba ti kaso ti covid-19 ditoy ciudad ti Laoag ket maibilang a nataltalgeden ti lugar manipod iti nasao a sakit no ikompara kadagiti naglabas a bolan ken tawen.
Iti baet daytoy, nagpanawagan ni Malicad iti publiko nga uray naluklukayen ti covid-19 restrictions ket pagtalinaeden latta ti naan-anay a panagan-annad tapno saanen nga agsubli ti panagngato ti kaso ti makapatay a sakit.
Innayon na a no saan nga importante ti pagturungan ket nasaysayaat no agtalinaed latta iti uneg ti pagtaengan kangrunaan na dagiti ubbing.
