LAOAG CITY – Naglikudan ti Iran ti rakurak ni United States Vice President JD Vance a palubosanna nga agsubli iti pagilian dagiti nuclear inspector kalpasan ti umuna a rikos ti panagsinnarita iti nagbaetan ti Washington ken Tehran a magun-od ti pinal a katulagan tapno lippasen ti gubat.
Inbatad ni Vance a maiyuswat ti panagsasaritada iti International Atomic Energy Agency (IAEA) ita nga aldaw maipapan iti agtultuloy a negosasion iti Switzerland.
Nupay kasta, inpetteng ti foreign ministry ti Iran nga awan ti inaramid ti Tehran nga aniaman a baro a commitment iti nuclear inspections.
Namunganay daytoy kabayatan ti temporario a panagpalukay ti Estados Unidos dagiti pannusa a mangipalpalubos iti Iran nga aglako ti langis iti US dollars iti umuna a gundaway kalpsan ti adu a dekada a naglabas.
Iti maysa a joint statement, inrakurak dagiti mediators ti Qatar ken Pakistan a kalpasan ti umuna a rikos ti panagsinnarita iti Swiss resort ti Bürgenstock no sadinno nga immannugot ti Amerika ken Iran iti maysa a roadmap nga agturong iti maysa a pinal a katulagan iti uneg ti 60 nga aldaw.
