LAOAG CITY – Natay ti driver ti motorsiklo kalpasan a naidungpar iti alad ti maysa nga apartment iti Brgy. 29, Sto. Tomas ditoy siudad ti Laoag.
Nabigbig ti biktima a ni Chyrus Abuloyan, agtawen ti 18, estudiante ken residente ti Brgy. San Marcos iti ili ti Sarrat.
Segun ken ni Police Master Sergeant Artemio Magaoay, Duty Investigator ti Laoag City Police Station – Traffic Division, kabayatan a dumaldalyasat ti nakamotorsiklo nga agturong nga agpa-daya ket kellaat a napukawan ti kontrol ti manibela a nangitunda ti pannakaidungparna iti alad ti maysa nga apartment.
Gapu iti daytoy, nagsagaba ti nakana a sugat iti ulo ti biktima ken naitaray iti Governor Roque B. Ablan Sr. Memorial Hospital ngem naideklara a dead on arrival.
Inlawlawagna a saan a nakasuot ti protective helmet ken mapapati a nakainom ti biktima idi napasamak ti desgrasia.
