LAOAG CITY – Inrakurak ni Solicitor General Menardo Guevarra nga umdasen a ti Executive Order tapno ipatungpal ti pannakaipawil iti operasion kadagiti amin a Philippine Offshore Gaming Operators (POGO) iti pagilian.
Segun ken ni Guevarra, ti panangipawil ket maysa a government policy ken gapu iti daytoy ti desision ti Presidente nga ipawil ti operasion dagiti Philippine Offshore Gaming Operators ket adda kadagiti otoridad.
Iti babaen ti linteg, dagiti amin a gaming operations ket adda iti babaen ti hurisdiksion ti Philippine Amusement and Gaming Corporation a direkta nga agrep-report iti opisina ti Presidente.
Nagkari met dagiti agpanpanday linteg manipud iti Senate and the House of Representatives nga itultuloyda ti panangisayangkat ti panagdengngeg ti komite kadagiti sakit iti komunidad a nangitunda dagiti Philippine Offshore Gaming Operators nangruna kadagiti imatmatonan dagiti sindikato a Tsino ken ipangpangruna ti panangaprobar kadagiti addang a mangipawil kadagiti nasao a kompania nga agnegosio iti pagilian.
Maipalagip nga iti maikatlo nga State of the Nation Address wenno SONA, inbilin ni Presidente Ferdinand Bongbong Marcos Jr. ti pannakaisardeng kadagiti amin a Philippine Offshore Gaming Operators iti katapusan ng ita a tawen ken inrakurakna ti maminpinsan a pannakaipawil kadagiti amin nga operasion iti offshore a panagsusugal iti baet ti panawagan ti publiko nga irikep ti industria.
Inbatad ti Philippine Amusement Gaming Corporation a kanselarenda dagiti lisensia nga inpaayda kadagiti 43 nga Internet Gaming Licensees (IGLs) kas panangsurot iti pammilin ti Presidente.
