LAOAG CITY – Manarimaan ti pannakaipatungpal ti flood control project iti lokal a gobierno iti ili ti Vintar.
Daytoy ket babaen iti panagkinnammayet ti Department of Public Works and Highways – First District Engineering Office ken ti Congressional Office no sadino napundoan daytoy ti 90 a milyon a pisos.
Segun ken ni Mayor Richard Degala iti ili ti Vintar, maipatpatungpal ti nasao a proyekto iti Brgy. Salsalamagui ken Brgy. Bisaya iti nadakamat nga ili.
Inlawlawagna a babaen iti daytoy a proyekto ket saan a madadael dagiti mula dagiti mannalon no adda ti sumangbay a napigsa a tudo.
Inbatadna nga adda ti naiyuswat a taripnong nga inatendaran da Mr. Edwin Cariño, Technical Consultant iti Congressional Office, pannakabagi ti National Irrigation Administration, Department of Public Works and Highways ken pakairamanan dagiti nagduduma a grupo dagiti zanjera dagiti mannalon ditoy probinsia.
Immuna iti daytoy, adda ti timmaud a parikot a saan a nagkikinnaawatan ti contractor ken dagiti zanjera ngem nasolbar met laeng daytoy.
