LAOAG CITY – Inbinsa-binsa ni Engr. Alwin Pido, Chief Maintenance Section iti DPWH Second Engineering District dagiti nakita da a nadadael wenno kimmaro ti dadael na gapo iti iduduprak ti Bagyo Florita.
Segun kenni Pido, dagiti dati nga adda ti dadael na a flood control projects a saan pay a natarimaan gapo ta awan pay ti naiparuk-at a pondo ket isu dagiti arig na nakaparwan gapo iti bagyo.
Karaman ditoy iti paset ti Barangay Madamba iti ili ti Dingras no sadinno ti inisyal a balor a naireport ket kaspaulan ti 25 a milyon a pisos tapno matarimaan daytoy.
Kunana a nadadael pay ti flood control project da iti Barangay Guerrero iti nasao met laeng nga ili ken ti inisyal a pondo a kasapulan ket 20 a milyon a pisos.
Malaksid iti daytoy, adda pay ti nakita da a damages iti Batac-Banna Road, Ilocos Norte-Abra Road, Batac-Pinili Road ken Apayao Road.
Inbatad na nga awan met dagiti nairekord a panagreggaay ti daga kadagitoy a lugar nangruna kadagiti kabanbantayan.
Nupay kasta, kunana a no napigsa ti tudo ket mairekrekomendar ti saan a panagdallayasat ditoy nangruna iti Abra Road gapo iti posible a panagreggaay ti daga.
Iti agdama, agtultuloy ti assessment ti nasao nga ahensya kalpasan ti isusuprak ti bagyo.
