LAOAG CITY – Nasken a maingato ti presyo iti kada kilo ti live weight iti panaglako ti baboy ditoy probinsya.
Daytoy ti inpakaammo ni Dr. Loida Valenzuela, provincial veterinarian kalpasan ti taripnong a naiyuswat iti kapitolyo probinsyal.
Kuna na nga inbaga ni Gov. Matthew Marcos Manotoc a masapul a maaddaan ti floor price ti live weight para iti panaggatang ti baboy.
Daytoy ket gapu ti saan nga agpapada ti presyo ti live weight manipud 110 a pisos agingga iti 125 a pisos ti kada kilo iti kallabes.
Inbatad ni Valenzuela, nga iti baet a nalaka ti live weight ket nagtalinaed ti presyo ti karne ti baboy iti 220 a pisos iti kada kilo nangruna idi bulan ti Marso ken Abril.
Inbunannag ni Valenzuela a possible nga umabot iti 125 agingga iti 130 a pisos iti kada kilo ti agbalin a presyo ti ti live weight ditoy probinsya no bilang maputar ti ordinansa seknan iti nasao a banag.
Inlawlawag na nga idi bulan ti Mayo, saan a nalugi dagiti naglako idi nasurot ti presyo ti live weight a 125 a pisos iti kada kilo ken 200 a pisos agingga iti 220 a pisos iti kada kilo ti karne ti baboy.
Nagpanawagan ni Valenzuela iti pannakikammayet dagiti stakeholders para iti pannakaipatungpal ti floor price ti live weight ti baboy.
