LAOAG CITY – Bimmaba ti 17.8 percent iti foreign direct investment (FDI) ditoy pagilian iti umuna nga innem a bulan ti 2026.
Segun iti Bangko Sentral ng Pilipinas, immabot laeng ti 3.38 billion dollar iti net foreign direct investment manipud Enero agingga iti Hunyo, nababbaba no ikompara iti 4.12 billion dollar iti kapada a panawen idi napalabas a tawen.
Karaman kadagiti rason iti panagbaba ti net investments iti debt instruments ken reinvested earnings dagiti gangganaet a kompania.
Kabayatanna, apagapaman a nakasubbot iti foreign direct investment idi Hunyo, a ngimmato ti 35.1 percent year-on-year iti 447 million dollar.
Inbatad ti Bangko Sentral ng Pilipinas a ti kangrunaan a nagtaudan ti equity capital placements iti umuna a semestre ket iti Japan, United States, ken Singapore, a naiturong iti manufacturing, financial and insurance activities, ken real estate.
