LAOAG CITY – Maobserbaran kadagiti tignay da Francine Diaz ken Seth Fedelin nga adda ti espesyal a relasyon da uray awan ti panangadmitir dagiti dua.
Iti isasango dagiti dua iti mediacon ti My Future You, a maysa kadagiti Metro Manila Film Festival (MMFF) 2024 entries ket madlaw ti naidumduma nga isem ken arigna kilkiligen ni Francine tunggal agsungbat ni Seth.
Nakigtot pay ti sumagmamano a press members iti naimatangan da idi malmalpasen ti presscon gapu ta arigna saanen nga aginnibbat ti ima da Francine ken ni Seth ken masansan ti panangurnus ti actor iti buok ti balasang.
Malaksid iti sweet moments dagitoy ket nabagas pay dagiti inibbatan a sarita ni Seth kas panangiladawan na no ania ti mapaspasamak iti nagbaeyan da ken ni Francine.
Iti pannakasaludsud ken ni Seth no maysa ni Francine kadagiti kayatna nga agbalin a paset iti masakbayan na ket simmungbat a dagus ti “wen” ti actor.
