LAOAG CITY – Dimmalan dagiti frontliners ditoy probinsia ti Capability Boost Training kabayatan ti multinational joint exercise on humanitarian assistance ken disaster response drill idiay Camp Cape Bojeador iti ili ti Burgos.
Daytoy ket babaen iti tulong ti Armed Forces of the Philippines, Philippine Navy, Philippine Marine Corps, Philippine National Police pakairamanan ti United States Marine Corps (USMC) ken Japan Ground Self Defense Force (JGSDF).
Babaen iti daytoy, dimmalan dagiti frontliners kadagiti nagdumaduma nga exercise iti panangsalbar iti maysa a biag no adda dagiti didigra a sumangbay.
Segun ken ni Ms. Ryan Rollaine Simon, Presidente ti Disaster Risk Reduction and Management Officers ti Ilocos Norte, daytoy nga aktibidad ket kalikagumna mangisalakan ti biag ken mangsolbar kadagiti emerhensia kabayatan ti natural disasters babaen iti epektibo a koordinasion, komunikasion ken panagtitinnulong kadagiti partners iti disaster response.
Mainaig iti daytoy, kuna ni Simon a napintas iti panangpabilegda iti pannakaammo ken paglainganda iti emergency response.
Naammoan a ti Humanitarian Assistance and Disaster Relief (HADR) capability demonstration ti tampok ti panagsanay dagiti amin a frontline agencies iti gobierno kangrunaanna iti air and boat operations.
Kabayatanna, nakipaset dagiti nagtipon a puersa manipud iti USMC ken JGSDF agraman dagiti nakipaset nga ahensia a buklen dagiti nakauniporme a serbisio manipud iti Ilocos Norte Police Provincial Office, Bureau of Fire Protection, Philippine Coast Guard, Marine reservists ken civilian volunteers manipud kadagiti Provincial ken Municipal Disaster Risk Reduction and Management Councils iti nagdumaduma a panagsanay.
