LAOAG CITY – Inpaganetget ti Malacañang a kasapulan pay nga adalen a naimbag ti panawagan a mangipatungpal ti fuel price freeze iti uppat a nagsasaruno a lawas a panagngato ti presio dagiti produkto a petrolyo.
Inbatad ni Communications Secretary Claire Castro, masapul nga ibalanse ti addang tapno saan a maapektaran dagiti oil companies a makikokoordinar iti gobierno.
Iti babaen ti Executive Order No. 110, adda ti bileg ti Presidente ken Department of Energy (DOE) a mangimaton iti oil companies pakairamanan ti panangikeddeng ti presio iti panawen ti national energy emergency gapu iti problema iti suplay iti Gulf region.
Iti baet daytoy, umig-iget ti panawagan para iti alisto nga addang tapno maipababa ti presio ti langis uray adda ti maipatpatungpal a fuel subsidies ken cash aid para iti transport sector.
Maipalagip a pinirmaan ni Presidente Ferdinand Marcos Jr. ti Republic Act No. 12316 a mangipaay ti bileg kenkuana nga isuspenso wenno kissayan ti excise tax iti langis.
Nupay kasta, agbalin nga epektibo laeng daytoy 15 nga aldaw kalpasan a nai-published.
