LAOAG CITY – Naipasa iti maikadua a pannakaibasana ti gakat a pannakaipababa ti gatad a pagngatoan ti renta dagiti stall owner iti Laoag City Public Market and Commercial Complex.
Nakaipalaon iti nasao nga ordinansa a maipababa manipud iti 3% per annum a pannakaipangato ti renta iti kada tawen ket mapagbalin a 1% per annum.
Basar iti Committee on Market and Slaughter House, daytoy nga addang ket namunganay kalpasan nga adda ti kiddaw dagiti stall owner a maipababa daytoy.
Inlawlawag ti komite a gapu iti napasaran nga epekto ti pandemia, panagngato ti presio ti gasolina ken pangta ti African Swine Fever virus a nangapektar kadagiti hog raisers ket pinatganda daytoy.
Kunana a napagnunumoan dagiti kameng ti Sangguniang Panlungsod ken stall owners a mapagbalin laengen a 1%.
Inyarig ti komite daytoy ti 10 a milyon a pisos a makolektar ti Market Master iti kada tawen ket imbes a 300 a ribu a pisos ti mainayon a pagngatoanna ket 100 a ribu a pisos laengen kas kaibatugan ti 1% annum.
Inpasigurado pay ti Committee on Market and Slaughter House a saan a maapektaran ti gagem ti lokal a gobierno a mangpangato ti income gapu ta tinawen met nga adda ti pagngatoanna daytoy.
