LAOAG CITY – Inadmitir ni Engr. Manuel Aurelio, ti Asst. City Engineer iti Engineering Office a saan nga agisusuot ti Personal protective equipment (PPE) dagiti garbage collector ditoy ciudad ti Laoag a kas iti rakurak ni Sang. Panlungsod Member Jason Perera.
Segun kenni Aurelio, uray pay iti kangitingitan ti pandemya ken inbaga dan kadagiti garbage collector nga agusar da ti Personal protective equipment ngem kalpasan ti dua agingga iti tallo nga aldaw ket nagreklamo dagiti maseknan gapo ta saan da a komportable nga agtrabaho no agisuot iti daytoy.
Kunana a daytoy ti gapo na no apay a saan nga agisusuot dagiti garbage collector ti Personal protective equipment.
Inbatad na pay a saan pay amin a garbage collector ket saan nga agus-usar ti gloves.
Inlawlawag na nga awan ti naited kenkuana a guidelines a kasapulan ti Personal protective equipment dagiti garbage collector rason a ti laeng maponpondoan ket dagiti kapote, butas, gloves ken dadduma pay.
Mainaig iti daytoy, kunana a gapo iti daytoy ket plano na a mangiyuswat ti taripnong tapno mapagsasaritaan daytoy a banag kasta met ti pondo a paggatang iti Personal protective equipment.
