LAOAG CITY – Im-imbestigaran dagiti otoridad ti napasamak a panagbettak iti sango ti NPS Gasoline Station iti Barangay Poblacion II idi rabii, aldaw ti Sabado.
Basar iti report ti Shariff Aguak Municipal Police Station, agarup alas-10:43 ti rabii idi nakangngeg ti napigsa a panagbettak dagiti pulis nga insigida a napan nagresponde iti lugar.
Iti panagsangpet dagitoy iti lugar, nadiskubre ti responding personnel ti maysa a crater nga asideg iti entrada ti gasolinaan a mapapati a gapu iti panagbettak.
Awan ti nairekord a natay wenno nasugatan iti insidente.
Iti naiwayat nga imbestigasion, rimmuar iti CCTV footage nga adda ti dua a saan pay a nabigbig nga indibidual a nakalugan ti motorsiklo a nakita a maipagarup nga agliklikos nga asideg iti lugar sumagmamano a minuto sakbay ti panagbettak ken alisto a timmalaw kalpasan ti insidente.
Insigida a nangiwayat ti dragnet checkpoint operations ti Philippine National Police kabinnulig ti Armed Forces of the Philippines tapno mabirokan dagiti suspek.
Nangiwayat met ti hot pursuit operations ti Shariff Aguak MPS kaduana ti PMFC at 44th Special Action Company idinto a manamnama a mangiwayat ti post-blast investigation ti bomb experts ti PECU-Maguindanao del Sur.
Agtultuloy ti naun-uneg nga imbestigasion tapno maammoan ti pakabigbigan dagiti suspek ken motibo iti insidente.
