LAOAG CITY – Dead on Arrival ti maysa a gasoline boy kalpasan a binagkong ti kainumanna iti Sitio Vhelma iti Brgy. Barcelona iti ili ti Solsona.
Segun ken ni P/Lt. Rowena Coloma, Deputy Chief of Police ti Solsona Municipal Police Station, nabigbig ti biktima a ni Vanie Galiza y Fabian, agtawen iti 30 ken awanan asawa idinto a ti suspek ket nabigbig a ni Rogel Agno y Reyes, agtawen iti 67, naasawaan ken mannalon nga agpada dagitoy a residente ti Brgy. Barcelona iti ili ti Solsona.
Inbatadna a basar iti inwayatda nga imbestigasion, kabayatan nga agiinum ti biktima ken suspek pakairamanan dagiti kakaduada ket kellaat a timmakder ti suspek ken napanna binagkong ti naminsan a daras iti akinkannawan a buksit ti biktima ken namindua a daras iti likudna.
Gapu iti daytoy, kuna ni P/Lt. Coloma a dagus a naitaray ti biktima iti Solsona Rural Health Unit ngem saan a nagbayag ket naiyakar iti Dingras District Hospital ngem naiyakar manen iti Mariano Marcos Memorial Hospital and Medical Center iti siudad ti Batac no sadinno a naideklara a dead on arrival babaen iti attending physician a ni Dr. Daniel Cañete.
Inlawlawagna a nangiwayat ti hot pursuit operation dagiti otoridad a nangitunda ti pannakaarestar ti suspek iti pagtaenganda no sadinno nga insukona ti kutsilyo a nausar iti insidente nga agatiddog ti 23 a sentimetro nga inimatangan dagiti barangay officials.
Innayonna a rumrummuar a ti motibo iti napasamak a krimen ket gapu iti dati a susik iti nagbaetan ti biktima ken suspek a nangdegdeg iti kinabartekda.
Naammoan a segun iti suspek ket masansan nga ibul-bully wenno tagtagabassiten isuna ti biktima rason a nabagkongna daytoy.
Kabayatanna, manamnama a sumango ti suspek iti kaso a Murder.
