LAOAG CITY – Ibaklayen ti Philippine Health Insurance Corporation (PhilHealth) ti amin a gastosen iti panaganak dagiti marigrigat.
Daytoy ket basar iti mailunglungalong nga House Bill 11414 wenno Expanded Maternity Care Package for Indigents and Financially Incapacitated Act nga inpila ni Rep. Jose Teves Jr.
Iti nasao a gakat, baklayenen ti PhilHealth ti amin a gastos dagiti nakukurapay a masikog ken magun-od ti “No Balance Billing Policy” ti administrasion Marcos Jr.
Kayatna a saoen, awan ti magastos ti pasiente maipapan iti antenatal care, normal delivery man wenno cesarean section ken newborn care.
Iti agdama, P6,500 aginga iti P20,000 laeng ti ibakbaklay ti PhilHealth kadagiti miyembro nga agpasngay ken depende pay daytoy iti klase ti delivery.
Inpetteng ti agpanpanday linteg, saan nga umanay ti gatad daytoy iti magastos iti pre ken post-natal health care services.
Iti baet ti napalawa a PhilHealth benefit package ken sobra a kuarta ti state health insurer ket arig nabati dagiti dadduma pay nga health care components kas ti maternity care benefits.
