LAOAG CITY – Inbatad ti Gender and Development Office nga dda ti nairekord a 122 a bilang dagiti agtutubo a babbai a nagsikog ditoy probinsya iti umuna a kwarter ita a tawen.
Inadmitir ni Mrs Janet London, ti mangidadaulo iti Gender and Development Office a makaalarma ti nasao a bilang gapu ta arigna dandanin maipada ti bilang a nairekord iti napalabas a tawen.
Inpakaammo ni London a kaadoan kadagiti agtutubo a nagsikog a nasapa ket manipod iti ili ti Paoay, Solsona, Vintar, Piddig ken ditoy ciudad ti Laoag.
Segun ken ni London, ti kaubingan a nairekord da ket agtawen ti 15.
Mainaig iti daytoy, kuna ni London a kalikagom da a maipababa ti bilang dagiti agtutubo a babbai nga agsikog tapno maliklikan ti possible a pannakairisgo ti salun-at ken biagda.
Iti agdama, makumikum ti Gender and Development Office para iti panagbisita da kadagiti Local Government Units ken dagiti pagadalan tapno mangiyuswat ti information dissemination seknan iti negatibo nga epekto ti nasapa a panagsikog ken no kasanu a maliklikan daytoy.
Maipalagip nga idi 2023 ket umabot ti nasurok a 500 nga agtutubo a babbai ti nairekord a nagsikog ditoy probinsya.
