LAOAG CITY – Inlawlawag ni Engr. Herbert “Bing” Agdigos, General Manager ti Ilocos Norte Electric Cooperative (INEC) a ngimmato ti singir ti kuryente.
Segun kenni Agdigos, ti dati ket 14 a pisos iti kada kwh, itan ket nasuroken a 16 a pisos iti kada kwh.
Inbatad na pay nga iti sumarsaruno a bulan ket posible nga agbaliw pay ti rate daytoy.
Karaman kadagiti dinakamat na a rason ket ngumina met ti paggatang da ken iti panaggaraw ti presyo ti coal ken mabalin a binulan nga agbaliw daytoy.
Mainaig iti daytoy, kuna ni Agdigos a nakairefund ti INEC ti 128 a milyon a pisos manipud iti 397 a milyon a pisos kadagiti member consumer.
Kunana a posible a mairefund amin kadagiti member consumer daytoy iti uneg sumaruno pay a 26 a bulan iti laksid a ti bilin ti Energy Regulatory Commission a maisubli daytoy iti uneg ti uppat a tawen, wenno saanen a madanon ti uppat a tawen sakbay a malpas daytoy.
